ان الهدف من انشاء هذا المنتدى هو الحفاظ على الذاكرة الشعبية لمراكش و التعريف بمآثرها التاريخية و مثقفيها وأعلامها .
 
الرئيسيةبوابة جديدةالتسجيلدخول

شاطر | 
 

 حجاية لفهامة

اذهب الى الأسفل 
كاتب الموضوعرسالة
HIND MGHARI
مشرف
avatar

عدد المساهمات : 255
تاريخ التسجيل : 01/11/2012

مُساهمةموضوع: حجاية لفهامة   الأربعاء فبراير 06, 2013 2:29 pm

واحد السلطان بغا يعرف أش تيقول الماء وهو تيغلى
وهو يقول للوزير ديالو
سير ابحث لي على من يعرف الحل ؟
مشى الوزير يبحث ,,, وهو يدق على واحد الدار وحلت ليه واحد البنت زوينة بزاف وسولها
فين أباك ؟
قالت ليه : ( مشى يكب الماء على الماء )
وفين خوك ؟
قالت ليه مشى لسوق الخسارة )
وفين أمك؟
قالت ليه : ( مشات تجبد الروح من الروح )
الوزير ما فهم والو... بقى واقف جامد في مكانه... تسنى اباها حتى جا وعاود ليه اش قالت البنت وهو يسولها وقالت ليه باللي قصدت :
باها مشا يسقي الدلاح
وخوها مشى يلعب القمار
وامها مشات تولد شي مرا .....(.قابلة زعما )
وهو يسول بنتو السؤال اللي جابو الوزير اش تيقول الماء ملي تيكون تيغلي ؟ )
وهي تقول ليهم :
( راه تيقول: من السما هويت ..وعلى الارض تستويت .. والعود اللي سقيت منو تكويت )
... الوزير مشا عند السلطان و حتى واحد ما جاوب على السؤال.. وهو يقول ليه دلك الكلام اللي قالت ليه هديك البنت الزوينة ..و هو يتزوجها السلطان .....ولكن البنت الفااهمة شرطت عليه تجلس معاه مللي يكون يحكم على الناس ...راه شرطات عليه ؟؟؟؟
واحد النهار كانو زوج مرافقين .واحد عندو حمارة ضارة وواحد عندو ناقة ضارة.. ولدو في الليل ناض مول الحمارة روم البكر (ولد الناقة )على الحمارة.. والدحش على الناقة.. .وفي الصباح الناقة تبعها الدحش .والحمارة تبعها البكر ....
ومول الحمارة قال :
_( اللي تابعو شي حاجة ديالتو )..
تخاصموا ومشاو عند السلطان .وهو يحكم لمول الحمار باش ياخد البكر ...وهي تسمع الحكم ..وشافت بعينيها مول الناقة خارج تيبكي ...
وهي تقول ليه :
_ ارجع عند السلطان وقول ليه راه كنت غارس الشعير جنب البحر.. وكالو لي الحوث ؟)
وارجع عند السلطان وقال ليه دلك الشي اللي قالت ليه ....وهو يقول ليه السلطان :
-علاه الحوث يا البليد تياكل الشعير ؟
وهو يقول ليه الراجل : وعلاه الحمارة تتولد البكر ....؟
زعاف السلطان وقال ليه شكون اللي قال هد الشي ..وقاليه : مراتك هي اللي قالت لي ..
جاء عندها السلطان وقال ليها :
_( خدي اللي بغيثي ويبري لدار اباك )
قالت ليه ( واخا ..نشربوا بعدا واحد الكاس ديال اثاي (الشاي )...وناضت دارت فيه كثير من السيكران ...مللي شرب السلطان وتبنج ...حطاتوا فصندوق وداتوا لداراباها وحطاتوا في وسط زريبة الغنم .....
مللي فاق السلطان قال ليها :
اش درتي .....؟؟
قالت ليه :
_ قلت ليا هزي اللي ابغيثي ..وسيري لدار اباك ...وانا بغيتك هير انتا ...
هو يقولليها : (وعلاش درتيني حدا الغنم ؟)
قالت ليه :
(هدي هيا لبلاصة ديالك .....)

ومشات حجايتي مع الواد ورجعت مع لجواد

الرجوع الى أعلى الصفحة اذهب الى الأسفل
حسن لمرابط
مشرف
avatar

عدد المساهمات : 143
تاريخ التسجيل : 19/10/2012

مُساهمةموضوع: رد: حجاية لفهامة   الخميس فبراير 07, 2013 2:44 pm

سلمت الاخت هند والله دكرتيني بايام الجدة رحمها الله
تحياتي
الرجوع الى أعلى الصفحة اذهب الى الأسفل
HIND MGHARI
مشرف
avatar

عدد المساهمات : 255
تاريخ التسجيل : 01/11/2012

مُساهمةموضوع: رد: حجاية لفهامة   الإثنين فبراير 17, 2014 2:56 pm


شكرا اخي على العبور الطيب
تحياتي
الرجوع الى أعلى الصفحة اذهب الى الأسفل
 
حجاية لفهامة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى ناس مراكش :: الكلام المرصع :: محاجي زمان-
انتقل الى: